Magpadayon ang Pilipinas nga makasinati og mga kondisyon nga susama sa La Niña hangtod sa buwan sa Marso, sumala kini sa Philippine Atmospheric, Geophysical and Astronomical Services Administration (PAGASA).
Gipasabot ni PAGASA Climate Monitoring and Prediction Section chief Ana Liza Solis, nga nagsugod ang La Niña alert sa nasod sukad pa kaniadtong Hulyo sa miaging tuig, apan wala pa kini nakab-ot ang angay nga activity threshold aron nga ideklara ang La Niña season.
Matud pa niini, subay sa ilang pagbanabana, adunay 72% nga posibilidad sa La Niña, ug wala kini gipasagdan sa state weather bureau ang kahigayunan nga maabot ang threshold sa La Niña sa mga umaabot nga bulan, apan posibleng dili kini magpadayon sama sa giingon nga full-blown La Niña nga mahimong magdugay og 6 ka bulan o labaw pa.
Pipila usab ka mga weather systems nga kasamtangang anaa sa nasud susama sa shear line, gumikan ang La Niña nagadala og kusog nga easterlies.
Busa, ang buhatan nagpasidaan sa publiko nga mag-igmat kanunay gumikan daghan pang mga weather system ang posibleng magdala og mga pag-ulan ug makahatag og mga pagbaha ug pagdahili sa yuta sa mga umaabot nga adlaw.
