DAVAO CITY – Nagtuo ang animal rescuer sa Happy Animals Club nga si Leah Daño nga pagpangdaut lamang ang mga alegasyon nga gipagawas sa Davao City Health Office batok sa ilahang animal shelter.
Sa pakighinabi sa Bombo Radyo Davao, gipanghimakak ni Daño ang daghanang mga alegasyon sa City Health Office nga posibleng magpasirado sa gimugnang animal shelter human sa dul-ang usa ka dekada.
Gibutyag ni Daño nga 2019 dihang nahimuyo sa lugar atbang sa maong pasilidad ang silingan nga paryente sa nitaliwan nga landlady ug bugtong nagreklamo batok kanila.
Gikatingad-an karon nila Daño ang pagpasaka og reklamo sa City Health nga daw baho ug saba ang maong pasilidad apan ang sila na mismo ang nagpaklaro nga limpyo ug well-managed ang nahisgutang pasilidad.
Gipanghimakak sab ni Daño nga dili nila ginapasulod ang mga sakop sa City Health Office sanglit, wala nila gisudlan ang maong pasilidad ug igo lamang sila gipanghatagan og sulat sulod na sa duha ka higayon.
Nabalda ang operasyon sa Happy Animals Club gumikan sa maong mga alegasyon ingon man pagpasuspinde kanila sa City Business Bureau, tinubdan sa maong kabalaka sa mga tagtungod kon asa nila i-turn over ang ilang giamuahang 200 ka mga binuhing hayop nga gipasagdan sa mga tawo.
Gikanayon sab ni Daño nga ilang gikadismaya ang ulahing pahimangno sa LGU nga ilang pamatyon ang mga gisagop nga hayop.
Nagpasalamat si Daño sa tanang mga nipadayag og suporta lakip na diha ang mga dagkong personalidad ingon man mga animal welfare support groups sa paglusad og kampanya batok sa pagpahunong sa suspensyon sa ilang operasyon.
Nanghinaot sab ang mga tigdumala sa Happy Animals Club nga sa umaabot nga panagpulong karong Oktubre 24, hingpit nang panumbalingan sa lokal nga panggamhanan ang ilang tubag ug panawagan alang sa kaayuhan sa ilang gipangsalbar nga mga hayop.
via || Bombo LJF
