DAVAO CITY – Nasapon sa mga otoridad ang usa ka pekeng dentista atol sa gihimong operasyon sa usa ka inn nga nahimutang sa Prk. Tindalo, Brgy. Magugpo Poblacion, Tagum City, Davao del Norte ning milabayng adlaw.
Giila sa CIDG-Davao del Norte Provincial Field Unit, Tagum Police ug Philippine Dental Association-Davao del Norte ang maong dinakpan nga si Queendilyn Ventura, 25-anyos, nagpuyo sa Prk. 2, Brgy. Semong, Kapalong, Davao del Norte.
Nasayran nga nasakpan ang maong dinakpan nga nagpahigayon og operasyon nga walay permit ug lisensya.
Nakumpiska gikan kang Ventura ang daghanang mga dentures nga ginakabit sa iyang mga biktimang kliyente, lakip na mga gamit sa dentistry nga nagkantidad og anaa sa P28,000.
Tingkagol na sa bilangguan ang pekeng dentista nga mag-atubang og kasong paglapas sa RA 9484 kon Philippine Dental Act.
