DAVAO CITY – Diretso sa presohan ug gi-andam na ang kaso nga iduso batok sa usa ka peke nga dentista nga nasikop sa gilusad nga operasyon sa otoridad sa Ubalde Agdao ning siyudad kagahapong adlawa.
Una ng giila sa Davao City Police Office-Investigation Detection and Management Branch, ang mga suspek nga sila si Sheena Mae Zabala, 22 anyos, residente sa San Miguel Digos City ug Lourie Jane Cirilo, 23 anyos, usa ka Brgy. Health Worker ug lumulupyo sa San Agustin, Digos City, Davao del Sur.
Wala nay nahimo ang mga nahisgutan dihang narekober gikan sa ilang posisyon ang mga nagkadaiyang butang nga ilang gigamit sa ilang mga customer.
Gipangunahan mismo sa Davao City Police Office-Intelligence and Detection Management Branch, Davao City Anti-Scam Unit ingon man mga personahe sa D’ Dental Squad (DDS) nga si Dr. Carlos T. Capitan II nga Chairman sab sa Phil Dental Association-Davao City Dental Chapter Council of Past Presidents ang pagsikop sa mga suspetsado.
Kahinumduman nga ubay-ubay na nga mga pekeng dentista ang nasikop sa otoridad dinhi sa siyudad hinungdan nga mas pahugtan pa karon sa otoridad ang paggukod sa susama nga binuhatan nga delikado alang sa publiko sanglit walay lisensiya ang mga suspek sa operasyon.
