Temporaryong nakagawas sa prisohan ang pedestrian nga gikasuhan human sa pagkamatay sa drayber ug helper sa truck gumikan sa kalit niining pagtabok sa may C.P. Garcia Highway, ning dakbayan, kaniadtong Hunyo 25, 2024.
Sumala pa ni P/Capt. Ruel Dionela, Deputy Station Commander sa Buhangin Police Station, nga nakatulog pa og usa ka gabii sa kulongan si Evalonie Intia Martinez, 32 anyos, usa ka Airport Security Assistant, apan nakapyansa kini og P60,000 sa kasong gina-atubang nga reckless imprudence resulting to multiple homicide.
Pagpaklaro sa opisyal nga bisan paman gawasnon kini karon, magpadayon gihapon ang kaso nga iyang giatubang.
Kahinumduman nga nakahimo sa kalit nga full brake ang driver nga giilang si Nestor Doronio, 56 anyos, taga-New Ilocos Magsaysay Davao del Sur kauban ang helper nga si KR Rasonable, 24 anyos, residente sa Bansalan Davao del Sur human ang kalit nga pagtabok ni Evalonie bisan paman nga naka “Go” signal ang traffic light alang sa mga sakyanan.
Sumala ni P/Capt. Dionela, posibleng wala nabantayan sa nahisgutang babaye ang signal atol sa iyang pagtabok gumikan naandan na usab nato motabok sa pedestrian lane sa pagtoo nga luwas kita bisan unsang panahona nga makadesidar kita sa paggamit niini.
Samtang sa pikas bahin, giklaro sa opisyal nga walay atubangon nga kaso ang driver sa jeep kansang nagpanaog sa Airport Security Assistant duol sa pedestrian lane.
Kini gumikan ang sayop lamang sa driver mao ang pagpanaog niini sa pedestrian lane inay sa yellow box kon loading and unloading areas, apan gawasnon gihapon ang babaye sa pagdesidar kung kanus-a kini motabok.
Hinoon, gibutyag niini nga na-issuehan na og citation ticket ang driver tungod sa kalapasan niini sa balaod sa kadalanan.
Kahinumduman nga nipatim-aw ug nangayo og pasaylo ang driver sa Buhangin Police Station kaniadtong nakalabay nga adlaw, gumikan sa kapakyasan nga inaog ang pasahero sa saktong lugar.
Pahimangno usab niini sa mga kaubanang driver nga mosunod gayud sa balaod trapiko aron dili mahimong rason sa mga disgrasya.
