Gikonsidera karon ni Davao City Mayor Sebastian Baste Duterte nga “politically motivated” ang mga lakang sa PNP mahitungod sa paggubot sa peace and order sa dakbayan.
Sa post sa mayor, gipakita niini nga anaa sa ikatulo nga pwesto ang Davao City nga adunay 71.8 safety index.
Sa maong talaan, gisundan sa dakbayan ang nasud Singapore nga adunay 77.0 index.
Gumikan niini, gibarugan sa mayor nga nagpadayon gihapon ang kaluwasan, kalinaw, ug kahusay sa syudad rason nga nakaluwat kini og pamahayag sa matud pa nakaminus nga lakang sa PNP.
Sumala pa sa mayor nga kung basehan lamang ang maong talaan, makita gayud ang mga pagpaningkamot sa kapulisan alang sa pagmentinar sa kahusayan sa Davao City.
Kabahin niini, nagpaguwa sab og pamahayag si Senador Bato Dela Rosa isip kanhi City Director sa DCPO.
Sumala pa sa senador nga dugay na nga giila isip Hall of Famer ang Davao City Police Office gumikan sa paghupot sa doktrina ug polisiya nga nagkanayong “Ang pulis mao ang komunidad ug ang komunidad mao ang kapulisan”.
Gipasigardo ni Dela Rosa ang ka-disiplinado sa katawhan kalakip na ang maayong relasyon sa kapulisan ug komunidad.
Alayon niini gibutyag sa nahisgutan nga kung ma-demoralize ang DCPO, mahulog nga mademoralize na usab ang komunidad.
Sa katapusan nipaabot og paghangyo ang senador sa PNP nga himoong pantay ang pagtrato niini alang sa mga opisyal sa tibuok nasud.
