Gikondena sa PDP Laban, nga gipamunuan ni kanhing Pangulong Rodrigo Roa Duterte, ang rekomendasyon sa House Quad Committee nga nagrekomenda sa pagpasaka og kaso batok sa kanhing Pangulo.
Ang rekomendasyon sa komite adunay kalabutan gihapon sa giingon nga “war on drugs” nga gipatuman sa nakalabay nga administrasyon.
Lakip sa mga gikasohan sa komite mao si kanhing Philippine National Police (PNP) Chief ug karon Senador Ronald ‘Bato’ dela Rosa, ug si Senador Bong Go, gumikan sa mga akusasyon nga adunay kalabotan sa mga krimen sa pagpatuman sa war on drugs.
Sumala pa sa PDP, ang maong lakang sa Quad Committee klaro nga politically motivated ug walay solidong basehan.
Gipasabot sa partido nga ang mga testimonya sa mga resource person sa 13 ka mga hearing sa Quad Committee resulta lamang sa pressure kon pagpamugos.
Gi-question usab sa PDP ang mga alleged threats sa komite ngadto sa mga resource person, nga kung dili musulti, mamahimo sila nga ma-contempt.
Gidugang pa sa partido nga ang mga pagdungog sa komite “bias” gayud batok sa mga Duterte gikan pa sa sinugdanan niini.
