DAVAO CITY – Mas gipakusgan pa ni Davao City Mayor Inday Sara Duterte-Carpio ang imbestigasyon sa mga City Government Employees batok sa iligal nga druga.
Kini human matud pa nga dako ang pagkadismaya ni Mayor Sara ngadto sa mga empleyado sa gobyerno nga gikareport nga nahilambigit sa iligal nga druga.
Kahinumduman nga pipila sab ka mga empleyado ang nasikop gumikan sa ginadili nga druga karon lamang bulana sa Disyembre.
Kalabot niini, mihangyo mismo si Mayor Sara sa Philippine Drug Enforcement Agency (PDEA) XI ug sa Davao City Police Office nga mas pahugtan ug pakusgan pa ang imbestigasyon sa mga buhatan sa gobyerno dinhi sa dakbayan.
Sumala sa pamahayag ni PDEA XI Regional Director Antonio Rivera nga hugtanon ang ilang pag monitor sa mga nahisgutan.
Gani, nadismaya sab kini gumikan nga isip matud pa usa ka government employee kinahanglan nga usa kini ka maayo nga ehemplo sa katawhan.
Dugang niya nga usa sa lakang nga ginamugna sa ahensya kini ang makanunayon nga pagpahigayon og drug test sa mga empleyado sa gobyerno.
Samtang, gipaniguro sab ni DCPO Pol Col. Kirby John Kraft nga padayon nilang gina monitor ang War on Drugs ilalom sa Duterte Administration.
