DAVAO CITY – Gikabuytag sa Philippine Drug Enforcement Agency 11 nga mibalor sa P21.3 million ang kantidad sa mga ilegal nga droga ang nakumpiska gikan Enero hangtod Disyembre 2023.
Sa ekslusibong pakighinabi sa Bombo Radyo Davao kang Noli Dimaandal, ang tigpamaba sa PDEA Davao, naglangkob sa maong ihap ang nakumpiskang kapin 5 kilos sa shabu nga nagkantidad og P34 million; ug 56 kilos sa marijuana nga anaa sa P6 million.
Samtang sa gilusad nga 2,012 ka mga anti-drug operations sa PDEA kauban ang ubang law enforcement agencies sa rehiyon, nakasikop kini og 2,547 ka mga tipayuhot og ilegal nga droga ug gilangkuban sa 2,275 ka mga lalaki ug 272 ka mga babaye.
Sa susama sab nga ihap nagagikan ang anaa sa 96 ka mga menor de edad nga nalambigit sa paggamit og ilegal nga droga diin 86 niini ang mga lalaki ug 10 ang mga babaye.
Sumala pa ni Dimaandal, sagad sa mga menor nga madakpan ang mga nakalingkawas gikan sa kulungan tungod sa bata nga pangidaron apan mibalik sab sa paggamit og pagpayuhot niini.
Nag-awhag sab ang PDEA ngadto sa mga drug dependents nga mutahan sa ilahang buhatan alang sa katugbang nga mga serbisyo sama sa rehabilitation and reformation program.
Hangyo pa sa opisyal nga batunan ang pamatasan sa culture of security nga kung may nakita, dapat magsalita aron walay madaot nga kinabuhi gumikab sa ilegal nga droga.
Sa pikas bahin, gitutukan karon sa PDEA 11 ang mga taho nga dunay nagabaligya og mga vape ug e-cigarette products nga nag-unod og marijuana oil nga target niini ang mga estudyante ug menor de edad sa rehiyon.
Hinuon, gipasalig sa ahensya nga nagpaniid na kini sa mga negosyo nga nagabaligya og mga vape products ingon man ang pagpahimangno sa katawhan mahitungod sa epekto nga hatud sa marijuana oil nga susama sab sa uga nga dahon niini.
via || Bombo LJF
