DAVAO CITY- Personal nga gipangunahan ni Pangulong Ferdinand Bongbong Marcos Jr. ang “lowering of time capsule” isip timailhan sa pagsugod sa pagtukod sa Samal Island – Davao City Bridge Connector Project nga magkonekta sa Isla sa Samal sa probinsya sa Davao del Norte ug sa syudad sa Davao.
Mitambong sab sa groundbreaking ceremony ang pipila ka national ug regional officials sa Department of Public Works and Highways (DPWH), Department of Tourism (DOT), Department of the Interior and Local Government (DILG) ug Regional Development Council (RDC-XI).
Ang nahisgutang four-lane bridge project ang nagkantidad og P23.04 billion diin aduna kini gitas-on nga 3.98 kilometers.
Ginalauman nga makumpleto kini ug hingpit mahimong operational sa tuig 2027.
Sa pikas bahin, gikanayon ni Adrian Tamayo, hepe sa Public Relations Division sa Mindanao Development Authority (MinDA) nga hilabihang makalipay ang maong proyekto nga usa matud pa ka simbolo sa kalambuan.
Ginalantaw sab nga ang konstruksyon sa maong proyekto ang makamugna og anaa sa 96,000 ka mga trabaho alang sa mga Dabawenyo.
Mitambong sab sa ground breaking ceremony sila DPWH Sec. Mauel Bonuan, Davao del Norte Gov. Edwin Jubahib, Department of National Defense Sec. Jose Faustino Jr, National Security Adviser Clarita Carlos , Mayor Sebastian “Baste” Duterte ug Vice President Sara Duterte.
Paghuman sa SIDC groundbreaking activity, mupaingon sab ang pangulo sa DPWH covered court sa Panacan, Davao City aron ipang-apud-apod ang nagkadaiyang tabang sa gobyerno gikan sa Department of Social Welfare and Development (DSWD-XI), Department of Labor and Employment (DOLE-XI) ug Department of Agriculture (DA-XI).
Mubisita sab ang Pangulong Marcos sa headquarters sa Eastern Mindanao Command (Eastmincom) sa Armed Forces of the Philippines sa Naval Station Felix Apolinario sa Panacan, Davao City diin personal sab niini nga saksihan ang ceremonial declaration sa Davao Region isip insurgency-free. Allianne Ferandos Silao
VIA|| ALLIANNE FERANDOS SILAO
