Dili babagan sa administrasyong Marcos ang prosecutor sa International Criminal Court (ICC) sa pag-interview sa lima ka mga bag-ong nasayran nga suspek sa mga nahitabong krimen sa anti-drug war sa Duterte administration.
Dugang gipahayag ni Solicitor General Menardo Guevarra nga gawasnon ang ICC prosecutor nga direktang estoryahon ang lima ka personalidad nga adunay kalabutan kuno sa maduguong drug war sa panahon ni kanhi Pangulong Rodrigo Duterte.
Apan giklaro usab ni Guevarra nga dili mutabang ang gobyerno sa pagahimuong imbestigasyon sa international prosecutor.
Dugay nang gibarugan sa kagamhanan sa Pilipinas nga walay legal nga obligasyon ang nasud aron mutabang sa ICC.
Nahilakip kuno sa lima ka mga suspek mao si kanhi PNP Chief ug sa pagkakaron si Senador Ronald Dela Rosa, kanhi PNP-Criminal Investigation and Detection Group Chief Romero Caramat Jr., kanhi Commissioner of the National Police Commission, Edilberto Leonardo ug lakip na ang kanhi PNP Chief Intelligence Officer Eleazar Mata.
Kung kahinumduman sa panahon ni dela Rosa, gidumalahan niini ang “Oplan Tokhang”. Subay kuno sa dokumento sa ICC, ang nahisgutang mga kanhi opisyal sa Philippine National Police ang nagmando nga pamatyon ang mga drug suspects ug mga user sukad sa tuig 2011 hangtod 2019.
Gipahayag pa sa Solicitor General, nahiabot sa buhatan niini ang ICC prosecutor ug mihangyo nga estoryahon ang lima ka mga opisyal.
Matod pa niini, mas gituho-an sa ICC prosecutor ang kabahin sa mga complainant ug dili ang gi-akusahan.
Gipahinumdum usab niini nga katungdanan sa prosecutor ubos sa Article 54 sa Rome Statute nga imbestigahan ang tanang inpormasyon kung kini ang makapaduot o mapawad-an ug gahum.
