Pasakahan na ug kasong theft ang usa ka babayeng pulis nga nasakpan nga nangawat ug salapi sa iyang kaubanan sulod sa police station ning siyudad.
Una ng naila ang dinakpan nga si Patrolwoman Rosa Lyn Sosas Molles, sakop sa Talomo Police Station.
Kumpirmado nga nangawat ang nahisgutan human nga na-videohan gamit ang cellphone diin gikuha niini ang kuwarta sa iyang kaubanan.
Nasayran nga dili kini ang unang higayon nga nangawat ang suspek diin gikompronta pa kini sa ilang hepe nga si Police Major Ronald Lao.
Una na sab nga gibutyag ni Police Brigadier General Marcelo Morales hepe sa PRO-XI nga dili nila i-tolerate ang susama nga binuhatan ug posibleng mataktak sa iyang katungdanan ang nahisgutang police officer.
Kahinumduman nga niadtong Abril 30 ning tuiga gidakop usab si Police Corporal John Francis Llego Casicnan human kini nadakpang nangawat gihapon og kwarta sa iyang kaubang pulis.
