Nakaplagan ang patayng-lawas sa usa ka wala mailhing lalaki sa daplin sa creek sa Davao River, dapit sa Purok 1A, Barangay Callawa, Davao City, niadtong Hulyo 12, 2025, pasado alas 10:40 sa buntag.
Gitaho sa kapulisan nga si Joel Ymia, 44 anyos, usa ka backhoe operator sa QMIX Company, maoy mitawag sa Matina Police Station aron ipahibalo ang nahitabong insidente nga nahimutang duol sa ilang opisina.
Gipadala dayon ni PMAJ Rejie G. Torrita, Station Commander, ang mobile patrol 2118 nga gimandoan ni PMSG Dante ug Patroman Wilfred Malayo, duty investigator, aron susihon ang report.
Pag-abot sa mga otoridad pasado alas 10:50 sa buntag, ilang nadiskubre ang patay’ng lawas nga naglutaw sa daplin sa sapa nga walay timailhan.
Gilayon nga gitawagan ang Scene of the Crime Operatives (SOCO) – DCFU11 alang sa pormal nga imbestigasyon. Gipangulohan ni PLT Sherwin Q. Valmores ang SOCO team, nga mibutyag nga ang biktima usa ka lalaki nga gitantiya nga 30 hangtod 40 anyos, adunay taas nga buhok, brown og panit, bungoton, ug adubay bun-og sa nagkadaiyang parte sa lawas.
Naghubo ang biktima ug relo ra nga itom og strap ang nabilin sa iyang lawas.Wala’y usa sa lugar ang nakaila sa patay’ng lalaki, ug base sa inisyal nga eksaminasyon sa SOCO, wala’y timailhan sa foul play nga nakita sa biktima.
Gidala ang patay’ng lawas ngadto sa M’deang Funeral Homes sa Barangay Mandug, Buhangin District, samtang padayon ang paningkamot sa kapulisan nga mahibal-an ang pagkatawo sa biktima ug masuta ang tinuod nga hinungdan sa iyang kamatayon.
Gihangyo sa kapulisan ang publiko nga adunay impormasyon kabahin sa maong insidente nga motaho dayon sa labing duol nga police station.
