DAVAO REGION- Padayon pa nga ginaila ang usa ka patay’ng lawas nga nakaplagan sa sagbutan nga bahin sa Barangay Asbang, Matanao, Davao del Sur pasado alas singko ang takna sa hapon, kagahapong adlawa.
Subay sa imbistigasyon sa kapulisan, nakaplagan sa mga residente sa nasampit nga lugar ang usa ka patay’ng lawas sa lalaki nga gibana-banaan nga nagpangedaron ug kuwarenta ngadto na sa kwarentay singko anyos, adunay suot nga gray t-shirt ug black short pants.
Ang biktima adunay tattoo sa guardian sa walang bahin sa iyahang bukton ug tattoo sa anchorians sa tuo nga bahin sa iyahang bukton. Ang biktima nakahiagom sab ug tulo ka mga samad pinusilan sa iyahang ulo.
Sa pagpanubay sa mga otoridad sa palibot sa maong dapit, walay matud pa’y nadungog ang mga tagbalay nga adunay buto sa armas ug gumikan niini nagtoo ang kapulisan nga gipatay ang biktima sa laing dapit ug gilabay lamang kini sa nasampit nga lugar tungod sa crime scene walay mga narekober nga mga ebidensya ang otoridad gawas lamang sa patay’ng lawas sa biktima.
Sa kasamtangan padayon pa ang ginalusad nga imbestigasyon sa kapulisan ron maila ang biktima ug masubay ang hinungdan sa pagpatay niini.
Nag-awhag sab ang kapulisan sa katawhan, ilabi na sa sikbit nga lugar sa Matanao nga gilayong makiglambigit kanila alang sa kasulbaran sa maong kaso ug mamahimong motawag sa buhatan sa Matanao MPS Hotline nga 09506417529.
