Niabot na sa 25 ka mga tawo ang namatay ug kapin sa 50 ang samaran human sa usa ka suicide bomber nga nagpabuto sa iyang kaugalingon sulod sa Saint Mar Elias Church nga nahimutang sa Dweila district sa Damascus, ang kapital sa Syria, niadtong Domingo.
Kini ang unang higayon nga nahitabo ang suicide bombing sulod mismo sa Damascus sukad napahawa sa poder si Bashar Assad niadtong Disyembre. Sumala sa Interior Ministry sa Syria, myembro sa grupong Daesh ang suspek.
Misulod kini sa simbahan, dayon namusil, ug pagkahuman gipabuto ang bomba nga gisul-ob niini.
Sumala pa nga duha ka tawo ang nalambigit sa maong atake, lakip na ang nagpabuto sa iyang kaugalingon.
Sa livestream sa Syria Civil Defense (White Helmets), makita ang makaluluoy nga kadaot sulod sa simbahan duguang salog, naguba nga mga bangko, ug nagkalat nga mga tipik sa semento.
Si Syrian President Ahmed Al-Sharaa, nga nangulo sa opensiba batok kang Assad sa wala pa siya mahimong temporaryong presidente niadtong Enero, makadaghang higayon na nga misaad nga iyang protektahan ang mga minorya sa panahon sa iyang pagdumala.
