DAVAO CITY – Walay nakita nga basura inay duruha lamang ka pusit o nokus ang nakita sulod sa tiyan sa namatay nga balyena nga narekober daplin sa baybayon sa Tagum City kagahapon.
Sa gipahigayon nga necropsy sa American marine biologist nga si Darrell Blatchley posibleng tungod sa paggamit ug dinamita o ang nasinatian nga kusog nga linog ang gikamatay sa 300 kls ug 9.5ft young adult pygmy sperm whale.
Gibutyag sab ni Blatchley nga wala siyay nakita nga plastic sa tiyan sa balyena sukwahi sa mga namatay nga balyena nga una ng napadpad sa mga baybayon nga sakop sa Davao region.
Nasayran nga kini na ang ika-upat nga namatay nga balyena sulod lamang karong tuiga.
Sa kasamtangan, gitun-an na sa Bureau of Fisheries and Aquatic Resources (BFAR) 11 ang sample nga gikuha sa balyena aron nga masayran kung unsa ang gikamatyan niini.
Kahinumduman nga nanawagan si Blatchley sa katawhan nga likayan ang paglabay ug basura sa baybayon sanglit sagad kini nga kaonon sa mga balyena.
