Patay, gikalot sa lubnganan ug gilugos!

CEBU CITY – Gihabwa matud pa gikan sa iyang lubnganan ang usa ka 22 anyos nga babayeng patay.

Saysay sa caretaker sa Ocaña Public Cemetery sa Carcar City, Cebu, nakurat matud pa kini pag-ayo human nga nakita matud pa niini ang lungon sa babayeng patay.

Dugang pa niini nga mas dako ang ilang pagkatingala human nga nagbilangkad na ang minatay ug wala nay panty ug bra rason nga ginatuohan sa kapulisan subay sa ilang inisyal nga imbestigasyon nga gilugos kini sa wala pa mailhing suspetsado.

Nasayrang bag-ohay lamang gilubong niadtong Oktobre 19 ning tuiga ang biktima ug namatay gumikan nabughat human nga nanganak.

Samtang pursigido ang kapulisan nga madakpan ang suspek aron mapasakahan kini og tukmang kaso.