DAVAO CITY- Gibarugan sa legal counsel sa Kingdom of Jesus Christ (KOJC) nga walay ginasupak nga balaod si Pastor Apollo Quiboloy.
Kini maoy tubag sa KOJC kalabot sa pagkwestyun sa publiko sa nahisgutang pastor nga inay motahan kini sa mga otoridad, mas gipili niining magtago na lamang.
Sumala pa ni Atty. Isaraelito Terroen, legal counsel sa KOJC nga usa kini sa opsyon sa pastor gawas pa sa pag file og motion for reconsideration nga nahisubay usab sa 1987 Philippine Constitution.
Gumikan niini, gipasabot sa nahisgutan nga dili tungod wala nagpakita, mopasabot na kini nga nakalapas sa balaod. Kahinumduman nga una nang gikabutyag ni Terroen ang matud pa “obsession” sa administrasyong Marcos kay Quiboloy bisan paman sa ginaka-atubang nga problema sa nasud.
Sumala pa niini nga posibleng ginabuhat kini sa maong administrasyon sa laraw nga wala nay mosiwalat pa sa ilang mga binuhatan.
Una nang gitanyag sa DOJ ang ₱10,000,000 nga reward money sa kinsa mang makatudlo sa nahimutangan ni Pastor Apollo Quiboloy, kalakip na ang pagtanyag usab og tinag ₱1,000,000 sa kinsa mang makatabang aron makit-an ang lima pa niining kaubanan nga sila Sylvia Cemañes, Jackielyn Roy, Cresente Canada, Paulene Canada, ug Ingrid Canada.
Apan ning kasamtangan, wala pay nipadayag og impormasyon kabahin sa mga nahisgutan.
