DAVAO CITY – Gibutyag ni Pastor Apollo C. Quiboloy nga ang impluwensiya ni Pangulong Rodrigo Duterte ang nahimong yawe sa kadaugan sa mga senatorial candidates sa administrasyon.
Sumala kang Quiboloy, founder ug leader of the Kingdom of Jesus Christ (KJC) The Name Above Every Name, Inc., nga gihimon endorso sa ilang kongregasyon ang kabahin lamang sa ilang kalampusan.
Gitataw sab sa nahisgutan nga tradisyon na sa mga kandidato nga mohangyo kanila ug endorsement ilabi na nga aduna silay 4 milyones ka mga miyembro sa KJC dinhi sa nasod ug duruha ka milyon ka mga followers gawas sa nasod.
Gi-angkon sab niini nga ang ilang simbahan misuporta sa tanan nga mga kandidato sa Pangulo.
Dugang ni Pastor Quiboloy nga nagduha-duha siya nga mo-endorso ug kandidato sa midterm elections, ilabi na nga aduna siyay mga higala nga politiko nga mamahimong madismaya sa higayon nga dili kini ma-endorso apan gi-angkon niini nga iyang gisuportahan si Ilocos Norte representative Imee Marcos nga nakasulod sa “Magic 12”.
Hinuon nanawagan sab si Quiboloy ngadto sa Commission on Elections (Comelec) nga imbestigahan ang mga discrepancies nga ilang gi-atubang atol sa eleksiyon kalakip na ang pagkalangan sa transmission sa electoral results ug malfunctioned nga vote counting machines (VCMs) sa pipila ka bahin sa nasod.
