Gikompirma sa Bureau of Jail Management and Penology (BJMP) kagahapong adawa, nga gidala sa ospital ang nakadetine nga fouder sa Kingdom of Jesus Christ kon KOJC nga si Pastor Apollo Quiboloy kaniadtong Sabado.
Sumala pa kang BJMP spokesperson Jail Superintendent Jayrex Bustinera, gidala ang Pastor sa Rizal Medical Center (RMC) sa BJMP-Pasig City Jail Male Dormitory, pasado alas-5 sa hapon atong Sabado human kini nakasinati og paglisud sa ginhawa.
Girekomenda usab sa BJMP Physician nga dalahon kini sa labing doul nga government hospital alang sa angay nga ‘medical intervention’.
Sumala pa sa BJMP official, girekomenda usab sa attending physician nga ma-confine sa ospital si Quiboloy ug na-diagnose kini nga adunay community acquired pneumonia.
Gisiguro usab sa opisyal nga magpabilin nga magpailawon sa kustodiya sa BJMP ang pastor ug gihugtan na sumala pa ang seguridad sa lugar samtang naka-confine kini sa ospital.
