DAVAO CITY – Paningkamutan matud pa sa Police Regional Office 11 ang pagkab-ot sa 3 to 5 minute response time sa matag krimen nga mahitabo dinhi sa rehiyon.
Gikanayon ni PRO 11 regional director Brig. Gen. Alden Delvo, iyang gimanduan ang maong direktiba nga pakusgan pa ang presensya sa kapulisan pinaagi sa pagronda sa mga kadalanan ug dili lamang sa ilang mga nagkandaiyang presinto alang sa hinaling pag-aksyon sa mga kriminalidad sa ilang lugar.
Gipaklaro hinuon sa opisyal nga dunay mga butang nga nagapa-delay sa ilang pagresponde sama sa panahon, trapiko ug distansya.
Kahinumduman nga pagbutyag sa tigpamaba sa PRO 11 nga si PMaj Atty. Eudisan Gultiano, madilatar sab ang oras sa pagresponde sa kapulisan gumikan sa mga susamang sirkumstansya.
Apan gipaniguro sa kapulisan nga aksyunan dayon ang bisan unsang report sa katawhan gikan sa pagdawat sa impormasyon ngadto sa paghatag og resolusyon.
Samtang gipasalig ni Delvo nga generally peaceful sa kasamtangan ang kinatibuk-ang seguridad sa rehiyon.
via || Bombo LJF
