DAVAO CITY- Nagbangutan ug nagmahay karon ang pamilya sa lalaking nalatayan sa iyang kaugalingong gimenahoang truck didto sa Km 12 road, Sasa, ning dakbayan, kaniadtong nakalabyng adlaw.
Sumala pa sa asawa niining si Merideth Balmore Sibayan, wala pa sa kondisyon ang lawas sa iyang ang partner niadtong higayona sanglit gikan matud pa sila nakilubong sa Mati City ug nidiritso lamang kini sa iyang trabaho isip driver sa truck atol sa ilang pag-uli.
Dugang pa niini nga mag-unom ka bulan pa lamang kini nga nagtrabaho sa iyang gitrabahoang kompanya rason nga wala nila damha nga sa maong trabaho kini makutloan og kinabuhi.
Kahinumduman nga nakabsan sa kinabuhi ang biktima nga giilang si Jerson Almero Ariston, 48 anyos, residente Prk 13, Tibungco, ning dakbayan human kini nalatayan sa iyang ginamanehoan nga truck nga matud pa sa mga nakakita, temporaryo kining mihunong sa kilid nga bahin aron sa pagsubay sa ligid nga bahin apan kalit na lamang midagan ang truck nga maoy hinungdan sa pagka-ipit niini.
Nasayran usab nga walay helper ang biktima ug naandan na niining magbyahe nga mag-inusara.
Ning kasamtangan, gipahiluna na ang patayng lawas sa biktima.
Subli sab nagpahimangno ang mga otoridad sa pag-amping kanunay sa kadalanan ug batason gayud ang pag-check sa kondisyon sa mga sakyanan ayha mobahe aron malikay sa susamang mga insidente.
