Mga Higala Komusta Ug Maayong Buntag!
Sa nakalabay nga mga adlaw, migawas ang resulta sa gihimong pagtuon sa Philippine Statistic Authority kon PSA nga sila nagsulti nga sa 10 mil nga income kada bulan paigo na sa usa ka pamilya nga dunay myembro nga lima.
Tungod sa gipagawas nila nga pagtuon daghan ang wala nakauyon sanglit layo kini sa tinuod nga sitwasyon kung buot subayon sa mga tigdumala sa nasampit nga ahensya. Alang sa mga kabus natong mga kaigsuonan nga dili nila masabtan kung giunsa pagkwenta sa nasampit nga ahensya kung nganung ingon ana ang migawas nga resulta sa ilahang pagtuon, nga pa sa ilahang pagduda na hinuon.
Dugang pa sa ilahang pagpasabot sa ilahang pagtuon nga kung ang usa ka pamiya dunay P10 mil, matag bulan nga income dili na kini gutomon nga sakto lang man kini alang kanila….!!! Apan ang pangutana kutob lang ba diay sa kaon ang panginahanglanon sa tawo? Tungod sa miguwa nga resulta daghan ang nangangha nga murag lisod man kini tuohan kung itandi sa realidad sa atong kinabuhi sa kasamtangan ilabi na sa mga presyo sa mga palaliton nga nagasaka, nga bisan ug unsaon pa nimo ug budget karon magkulang lamang gihapon? Bugas pa lang daan, ug panud-an, dili pa apil sa kwentada ang mga galastuhon sa adlaw-adlaw nga mga lihukon. Wala pay labot niana ang kapritso sa tawo sama sa mga bisyo, mga panginahanglanon nga natukma sa panahon karon sama sa load sa cellphone ug uban pa.
Alang nako lisod dawaton sa mga katawhan ang pahayag sa gitugyanan nga ahensya sa atong kagamhanan tungod kay dili lang sa maong kantidad matubag ang mga panginahanglanon sa tawo ilabi na kung dunay lima ka mga myembro sa matag pamilya.. Panawagan sa kadaghan, unsa kaha kung ilaha kining sulayan?
Kay kini nga kantidad kung drea lang sa syudad, kulang pa kaayo ni kung tinud-on lang sa paggasto sa pagkaon, nga bisan ug atong tinambanon nga sa matag adlaw nga kaon labing minus mugasto kita ug kantidad nga 200 pesos sa lima ka myembro sa pamilya, mukabat naman sa 6 mil. Unya ning pagkauna duna kahay kasiguruhan nga ang imung makaon puno sa bitamina?
Naa pay pamasahe alang sa mga estudyante ug mga allowance. Ug sa imu pang galastuhan sa panimalay. Naa pay mga produkto karon nga nagsige na lang sa pagsaka ang presyo kung imung paliton pero kung imung podukto ang ibaligya nga abot gikan sa imung mga tanom halos naman pangayuon. Maayo lang unta kun anaa kita kanunay sa maayong panglawas kay aron kita maluwas sa mga galastuhan gikan sa tambal ug hospital.
Siguro karon angay nga lantawon sa gobyerno kung unsaon sa pagpaubos ang mga presyo karon sa mga nag-unang palaliton nga maoy labing gikinahanglan karon, kay sa atong tan-aw daw nawala man kita sa balanse sa ekonomiya karon, ilabi na ang pagsigeg saka sa lana, apan ang mga produkto gikan sa sector sa agrikultura.
Angay lantawon pag-ayo sa mga hingtungdan ahensya sa gobyerno ning panahon sa semana Santa manghinuklog kita kung unsa ang angayan nga buhaton aron makalingkawas ang mga kabus sa tumang kawad-on.
