DAVAO CITY – Nagmalampuson ang nahitabong Pahalipay sa Taal karong tuiga nga usa ka tinuig nga tradisyon sa pamilyang Duterte.
Libuan ka mga katawhan ang midagsa sa Taal, Royal Valley Bangkal, Brgy. Talomo Proper ning syudad sa Davao atol sa naandan nga Pahalipay sa pamilyang Duterte kagahapon.
Gumikan sa kadaghan sa mga indibidwal nga midagsa sa nahigutang lugar sukad pa kaadlawon, miabot pa sa Ulas area ang linya sa buot nga makaangkon sa pahalipay.
Adunay upat ka linya ang gipatuman alang sa hapsay nga pagpangapud-apud nga gilangkuban sa mga buntis, Bata, PWD, mga edaran, babae, ug lalaki.
Nahatagan sab og paunang tambal ang mga gipangkuyapan sa taas nga linya ug kainit sa panahon.
Anaa sab sa panagtigom si Vice President Sara Duterte nga nakighimamat sa mga anaa sa pahalipay.
Nasayran nga mokabat sa kapin kuwarenta mil ang gibana-banaan nga mga indibidwal nga nakaangkon ug pahalipay sa pasko.
Nadawat sa mga naglinya atol sa pahalipay ang lima ka kilong bugas, delata, gift certicicate nga nagkantidad og P300, cash nga P150 ug food pack.
Alas dose y media sa udto gipatuman na ang cut off sa mga naglinyaug sumala pa adunay natagaan na nga kapin sa baynte mil ka mga indibidwal.
Sumala pa sa Davao City Police Office, miabot sa 40,000 ang midagsa aron makakuhag pinaskuhan gikan sa pamilyang Duterte.
