Panahon na kuno nga maghisgot ug balaod ang Pilipinas nga mobutang sa ginatawag nga “designated survivor” susama sa gihimo sa Estados Unidos, Japan, Canada, United Kingdom ug Japan. Gikasugyot ni retired Supreme Court Justice Reynato Puno nga angay hatagan ug pagtagad sa kongreso ug executive department ang sitwasyon nga wala nahunahunaan sa dihang gimugna ang 1987 Constitution.
Migawas ang nahisgutang hisgutanan nga magbaton ug designated survivor sa dihang gipahayag ni Vice President Sara Duterte nga dili kini mutambong sa State of the Nation Address ni Pangulong Bongbong Marcos gumikan kay gitudlo niini ang iyang kaugalingon nga designated survivor.
Nasayran nga sa Estados Unidos ang designated survivor mao ang indibiduwal nga gitudlo nga mopuli sa Presidente ug mamahimong wala nahilakip sa higayong nagtapok-tapok ang tanang hataas nga opisyal sa nasud.
Nagtuo ang retired Supreme Court Justice nga ang pagtudlo sa successor sa pangulo ang importante gumikan na usab sa nagpadayong tensyon tali sa Pilipinas ug China gumikan sa West Philippine Sea (WPS).
Tumong niini nga malikayang makabaton ug power vacuum sa gobyerno panahon sa emergency kung diin permanenteng mawala ang tanang opisyal sa gobyerno.
