DAVAO REGION- Laraw karon sa Agricultural Training Insititute XI- Regional Training Center ang pagtanyag og mga programa aron sa pag-engganyo sa mga kabatan-onan nga makiglambigit sa agrikultura.
Gikanayon ni Maria Cristine Rosan Besario, RTC Davao Region Media Production Specialist II nga aduna silay non-degree programs nga ginahatag sa mga kabataan gawas pa sa degree sholarship nga Educational Assistance for the Youth in Agriculture.
Ginahimo sa maong ahensya ang mga nahisgutan gumikan sa namatikdang nagkagamay nga ihap sa mga kabatan-onan nga mokonsidera sa kurso nga agrikultura sa kolehiyo, ingon man sa kamatuoran nga kadaghanan niini ang dili na gusto mosunod sa gidak-ang trabaho sa pamilya nga pag-uma.
Gani, gitagaan og gimbug-aton sa opisyal ang exposure sa mga kabataan sa organic agriculture sulod sa onse ka bulan nga training kung diin ipangdeploy kini sa mga nagkadaiyang tuunghaan o learning sites susama na lamang sa training gawas sa nasud pinaagi sa International Exchange Program.
Matud pa nga dako og potensyal ang nasud sa agrikultura kung tagaan lamang kini og bili sa kadaghanan.
Sa pikas bahin, ginatutokan karon sa nashigutang ahensya ang Digital Farmers Program dinhi sa rehiyon.
Kini aron adunay kahibalo ang mga mag-uuma kung unsaon paggamit sa teknolohiya kalabot sa agrikultura kung diin pwede kining magamit alang sa social media marketing.
Ning kasamtangan, moabot na sa kapin 500 ka mga mag-uuma ang nipailalom sa maong pagbansay.
