DAVAO CITY- Nahimong hapsay ug malinawon ang kinatibuk-ang pagsaulog pinaka-unang Duaw Davao Festival sa dakbayan.
Sumala pa sa tigpamaba sa Davao City Police Office nga si P/Capt. Hazel Tuazon, kini gumikan sa pagpaningkamot sa mga nagkadaiyang hingtungdan ahensya aron sa pagsalig nga luwas ang katawhan sa kapin usa ka semana nga selebrasyon.
Kahinumduman nga nagsugod ang maong festival kaniadtong Hunyo 21 pinaagi sa Music Fest ug gisundan kini sa Pride Sportsfest kaniadtong Hunyo 22 diin sa susamang adlaw, gipahigayon usab ang Reyna ng Davao Coronation Night.
Daghan sab ang nalingaw ug nagpasundayag sa Duaw Davao Pride Parade nga gitambungan sa mga kaigsuonan natong LGBTQIA+++ community.
Gisundan kini sa Night of Fun and Colors kaniadtong Hunyo 23, samtang daghan sab ang niduaw sa arts and food bazaar kaniadtong Hunyo 27-30.
Ubay-ubay sab nga mga deboto ang nitambog sa santos nga misa atol sa pagsaulog sa ika 176th parochial fiesta celebration ni Sr. San Pdero sa San Pedro Cathedral kaniadtong Hunyo 29.
Gumikan niini, nagpa-abot og pasalamat ang opisyal ngadto sa katawhan nga nipartisipar, ingon man sa mga nitambog sa gitanyag nga aktibidades sa City Tourism Operations Office diin nakahatag og hugyaw ug kalingawan sa mga dabawenyo ug lakip na sa mga bisita.
