DAVAO CITY – Sama sa milabay nga mga tuig, lauman nga mamahimong simple lamang ang pagsaulog ni Pangulong Rodrigo Duterte sa iyang ika-77 nga adlaw’ng natawhan karung adlawa.
Himuon lamang sa Pangulo nga pribado ang pagsaulog kauban ang iyang pamilya ug mga apo.
Kahinumduman nga una ng gihimo sa Pangulo ang iyang naandan panahon sa iyang birthday nga mao ang pagbisita sa mga bata adunay cancer sa Southern Philippines Medical Center (SPMC).
Pipila ka bulan ayha mukanaug sa iyang katungdanan, gikanayon sa Pangulo nga mubalik na kini sa siyudad ug natuman na matud pa niini ang iyang trabaho ug pangandoy sa iyang mga anak nga susama sab nga anaa sa pulitika.
Una ng nagpadala ug mensahe si Davao City Mayor Inday Sara Duterte-Carpio diin wish niini nga maangkon sa Pangulo ang maayong panglawas ug kalipay.
Samtang naglaum sab ang Pangulo nga makapahigayon ug limpiyo, patas ug matiunud-anon nga eleksiyon sa May 2022, ayha ang magbaylo ug gahum isip kabahin sa iyang legasiya.
