DAVAO CITY – Gikaalarma sa Reproductive Health and Wellness Center sa Davao City Health Office ang ubay-ubay nga pagsaka sa mga kaso sa HIV-AIDS diri sa Davao Region.
Subay sa datos nga nahipos gikan Enero hangtud Setyembre ning tuiga, adunay 396 ka mga kaso nga katugbang sa 40 ngadto sa 44 ka mga kaso karong bulan.
Gikanayon ni Dr. Jordana Ramiterre, head physician sa balay tambalanan, mas hataas kini gikan sa mga natalang average number of cases diri sa Davao City sulod sa lima ka tuig nga mukabat lamang sa 32 ka mga kaso. Kasagarang nasa 25 – 34 anyos ang pangidaron sa mga nataptan.
Samtang duna na sab natalang susuamang kaso sa usa ka kinse anyos gumikan sa mother-to-child transmission. Nasayran nga usa sa nag-unang rason niini ang pakighilawas nga walay proteksyon.
Ginaawhang karon sa buhatan ang katawhan ilabi nang mga aktibo sa pakighilawas nga magpa-test aron masayran ang estado sa ilang panglawas, ug mahatag sab ug saktong pagpanambal sa maong incurable nga balatian.
Ang HIV kon Human Immunodeficiency Virus, usa ka kagaw nga muatake sa immune system sa usa ka tawo.
Kon muhinay ang resistensya sa tawo, posible kining maghatud ug AIDS kon Acquired Immune Deficiency Syndrome nga usa sa mga pinakalisud nga matambalan nga sakit.
Usa ang Davao City sa dunay taas nga kaso sa HIV-AIDS sukad sa pagkadiskubre sa pinakaunang kaso niini niadtong 1993.
VIA || Bombo LJ Florendo
