DAVAO CITY- Gikondena ni Davao City Mayor Sebastian “Baste” Duterte ang pagrelieve sa 19 ka mga station commanders ug OIC sa Davao City Police Office (DCPO).
Sa gipaguwa nga pamahayag sa mayor, gipunting niini ang dugay nang pag-ila sa dakbayan isip usa ka malinawon ug hapsay nga syudad gumikan matud pa sa kombinasyon sa political will, dedikasyon sa nagapatuman ug balaod, kalakip na ang kooperasyon sa katawhan.
Alayon niini, wala giuyonan sa mayor ang kamandoan ni Police Regional Office XI, Regional Director PB General Nicolas Torre nga ibalhin ug pulihan ang 19 ka mga kapulisan kansang nagpahinungod sa ilang kinabuhi aron lamang sa pagserbisyo sa katawhan ug sumala pa dili angayang makadawat sa maong pagtratar.
Sumala ni Baste, nakaminus ang maong lakang sanglit mahulog nga nakwestyun na hinoon ang kapasidad sa mga opisyal inay nga ilhon ang ilang pagpaningkamot.
Dugang pa sa mayor nga kung gihuna-huna ni General Torre nga dili epektibo ang mga kapulisan sa syudad, giunsa pagkahitabo nga ang susamang institusyon nga iyang gipangulohan ang makanunayong nagpasidungog sa Davao City Police Office isip top performing police office sa rehiyon.
Kahinumduman nga una nang giklaro sa PRO XI nga kabahin lamang ang maong lakang sa tahas sa Regional Director nga modestino ug magdestino sa mga opisyal sa kapulisan.
Sa pikas bahin, pormal nang milingkod ang mga bag-ong hepe sa Police Stations sa DCPO human sa gipahigayong turn-over of ceremony, kagahapong adlawa.
Nangayo sab og pagsabot ang DCPO human nga gikanayon sa tigpamaba niini nga si PCapt Hazel tuazon nga wala na’y mahitabo pang coverage gikan sa media subay na usab sa kamanduan sa dagkong opisyal sa kapulisan.
