DAVAO CITY – Giaprobahan sa Davao City Council ngadto sa ikaduhang pagbasa ang usa ka lakang nga pakawad-an og bisa ang gipagulang ordinansa alang sa mandatory nga pagsul-ob og face mask sa mga pampublikong lugar tungod sa COVID-19 pandemic.
Ang sugyot balaudnon nga pagawagtangon ang City Ordinance No. 0307-20, Series of 2020, ang tubag sa Proclamation No. 297, Series of 2023 nga nagpatangtang sa public health emergency sa COVID-19 sa nasud.
Gikanayon ni Committee on Health chairperson ug Davao City 2nd District Councilor Cheche Justol, makapawala ang gisugyot nga ordinansa sa mga silot nga gipahamtang sa maong ordinansa alang sa mga nagmalapason niini.
Apan, kon aprobahan sa konseho sa siyudad ug pirmahan ni Mayor Sebastian Duterte, kinahanglan pa nga mobayad sa ilang multa ang mga tawo nga adunay pending nga kaso sa paglapas sa maong ordinansa.
Sumala sa datus sa Davao City Police Office, anaa sa 8,392 sa 13,399 ka mga nakalapas gikan Enero 1, 2022 hangtod Disyembre 31, 2022 ang wala makabayad sa ilang multa. Gitumbok niini nga 5,007 ka mga violators ang nakahusay sa ilang mga obligasyon.
Nanghinaot ang konsehal sa hingpit nga pagrepaso sa kasamtangang ordinansa aron mahiuyon sa kasamtangang realidad.
Gisugyot usab niya ang lain nga resolusyon aron dasigon ang pagsul-ob og face mask, labi na sa mga eskuylahan diin gikonsentrahan ang mga bata, bisan wala kini gimando sa nasudnon nga balaod.
