DAVAO CITY – Walay kabutangan sa kalipay ang nabatian sa topnotcher sa March 2024 Licensure Examination for Teachers nga si Javerson Loquina. Sa pakighinabi kaniya sa Bombo Radyo Davao, gikanayon ni Sir Jav nga dugay na niyang gi-manifest ang pagkab-ot sa pinaka-unang pwesto sa board exam.
Dungan sa iyang pagka-working college student kaniadto, labaw pa sa iyang pag-review alang sa eksaminasyon, gigahinan niya og hataas ug halapad nga pagpangandam ang pagtuon sa mga minor ug major subject nga iyang pagatubagon sa adlaw sa exams.
Sumala kang Javerson, dagkong bahin sab sa iyang pagpangandam ang work-life balance kon ang paghatag og igo nga oras sa pagpanarbaho isip electrician ug pagtuon sa matag-adlaw.
Miabot sab sa punto nga kinahanglan niya nga hunungon ang pagpanarbaho aron makapokus sa review ug siya mismo ang naggasto sa kaugalingon sa iyang pag-review.
Giangkon sab niya nga wala kini nagasunod sa mga pamahiin sa exam, gawas na lamang sa pagpatahal sa iyang lapis sa mga ginikanan nga usa ka simbolo nga naglibot sa walay puas nga suporta nga gihatag kaniya sa iyang academic journey.
Laraw karon ni Javerson nga mapahimuslan pa ang iyang abilidad ug lisensya sa pagtudlo agig pagbalik sa tanang dungog ug himaya sa Labawng Makagagahum.
Nakaangkon si Javerson og 93.80% subay sa resulta nga gipagawas sa Professional Regulation Comission.
Siya ang labing unang top notcher nga graduate sa Christian Colleges of Southeast Asia, ning dakbayan.
Nigradwar kini isip Cum Laude niadtong 2023 sa kursong Bachelor in Secondary Education major in Filipino.
Gawas sa hobby nga hiking, aduna sab kini talento sa spoken word poetry.
via || Bombo LJF
