DAVAO CITY – Kinahanglan na sumala pa nga likayan ang pagparada sa mga sakyanan daplin sa kadalanan ilabina sa mga subdivision ug public roads kini aron mahawanan ang mga kadalanan sa mga babag ilabi na panahon sa traffic ug emerhensiya.
Sumala pa kang Konsehal Conrado Baluran, angayan nga mohimo na og lakang ang lokal nga panggamhanan aron nga masolusyonan na ang suliran sa trapiko sa dakbayan ug bugtong pamaagi niini ang pagtangtang sa mga babag sa kadalanan.
Partikular sumala pa nga pagakuhaon mao kadtong mga sakyanan nga giabandona lamang ug nakaparada daplin sa mga subdivision ug public roads nga maoy sagad gamiton sa mga motorista.
Gihangyo sa konsehal ngadto sa City Transport and Traffic Management Office (CTTMO) nga magpahigayon og road tax mapping sa mga giilang interior ug national roads nga adunay gi-abandona nga mga sakyanan nga nakaparada alang sa towing o pagtangtang niini gikan sa maong lokasyon.
Una na sab nga gibutyag sa konsehal kinsa mao ang chairperson sa transportation committee nga kinahanglan hatagan og pagtagad ang nagkagrabe nga sitwasyon sa trapiko sa dakbayan ilabi na karon nga milambo pa ang ekonomiya ug miresulta kini sa nagkadaghan sab nga mga sakyanan nga nagdagan karon sa mga kadalanan.
