DAVAO CITY – Padayon ang panawagan karon sa mga hingtungdang ahensiya sa kagamhanan partikular na ang City Health Office (CHO) ngadto sa publiko nga batasanon ang pagpanglimpiyo sa palibut aron nga malikayan ang pagdaghan sa lamok nga nagdala ug sakit nga dengue.
Gihimo sa ahensiya ang panawagan human nga nakatala na matud pa ang buhatan og 20 ka kaso sa dengue sulod lamang sa bulan sa Enero.
Naglaom na lamang karon ang ahensiya nga sa dili pa matapos ang kasamtangan nga bulan, dili na mosaka ang nahisgutan nga ihap.
Nasayran kang CHO head Josephine Villafuerte nga sa milabay nga tuig, mikabat sa 298 ka kaso sa dengue ang natala sa CHO sa susama nga panahon.
Wala gipadaplin sa ahensiya ang posibilidad nga madungagan pa karong bulana ang kaso sa dengue ilabi na nga nasinatian sab karon ang mga pag-ulan.
Apan luyo niini, gipasalig sa ahensiya nga padayon sila sa ilang mga programa aron nga batukan ang kaso sa dengue sama na lamang sa fogging ingon man maghatag og insect repellent ug daghanan pa.
