DAVAO CITY – Sugdan na karong adlawa ang pagpang-apud apod ug Social pension sa Department of Social Welfare and Development Office (DSWD) ngadto sa ilang pensioner ilabi na kadtong mga kabus nga tigulang.
Una ng gipasabot sa ahensiya nga nalangay ang ilang pag-release sa Social Pension gumikan kay nagpahigayon sila ug data cleansing ug mas gihatagan ug prayoridad kadtong mas nanginahanglan ug hinabang.
Sumala pa kang Arris Medrano, head sa Social Pension program management office sa DSWD 11, nga mukabat sa 254, 527 ang ihap sa mga pensioner dinhi sa Davao region apan posiblen nga makunhuran na kini gumikan sa gipahigayon nga data cleansing sa ahensiya.
Nanawagan sab si Medrano sa mga tigulang nga edad 60 pataas ug walay nadawat nga pension matag bulan nga pahimuslan ang maong programa sa kagamhanan.
Gitino sab niini nga makadawat pa gihapon ug pension kadtong mga namatay karong tuiga apan kinahanglan nga mopatim-aw sa buhatan ang mga lihitimo nga mga kabanay niini.
Una na matud pa nga gimando ni Pangulong Rodrigo Duterte nga kinahanglan kadtong mga kabus ang makapahimulos sa social pension kini aron adunay magasto ang mga nahisgutan ilabi na sa pagpalit ug tambal.
