DAVAO CITY – Giklaro sa security officials ning dakbayan sa Davao nga walay “white-van kidnapping” o puting van kidnapping incidents sa siyudad human nga daghanang migula nga balita sa online kalabot niini.
Sumala pa kang Public Safety and Security Command Center (PSSCC) head Angel Sumagaysay nga ang pagpakatag sumala pa og sayop nga impormasyon kalabot sa puti nga van nga nagapangkidnap og mga indibidwal ang makamugna lamang og kahadlok sa uban.
Sa kasamtangan, wala sumala pa silay nadawat nga report kalabot sa susama nga insidente dinhi sa siyudad.
Kahinumduman nga ang “puting van” una ng migula sa social media sa milabay nga mga bulan ug gani aduna pa kini mga online memes.
Gikanayon ni Davao City Police Office (DCPO) Deputy Director for Administration Noel Silvoza nga walay kamatuoran ang maong impormasyon ilabi na nga wala pa silay natala nga blotter nga adunay nawala nga indibidwal nga gikanayong gi-kidnap sa puti nga van.
Hinuon bisan nga walay kamatuoran ang maong report, pabilin sumala pa nga alerto ang DCPO sa sitwasyon sa lugar ilabi na karon nga nagsaulog ang siyudad sa Pasko Fiesta 2019.
