DAVAO CITY – Ginasubay gihapon sa Samal PNP ang kamatayon sa duha ka mga menor de edad nga gikatahong gipangpusil sa wala mailhing suspetsado sulod mismo sa computer shop sa Prk. 3, Brgy. Camudmud, Babak District, Island Garden City of Samal.
Subay sa report, giila ang mga biktima nga mga menor de edad nga sila alyas Daniel, 17 anyos; ug alyas Filjack, 14 anyos.
Pagbutyag sa usa ka testigo, kalit lamang misulod sa internetan ang duha ka mga wala mailhing lalaki nga sakay sa motorsiklo gikan sa national highway nga kalit lamang namusil sa mga biktima sa makadaghang higayon ug dali sab misibat sa wala matinong direksyon sakay sa itom nga motorsiklo.
Nakuha gikan sa crime scene ang 5 ka mga kabhang sa bala sa gituohang .45 kalibre nga pistola ug lain pang 2 ka mga fired bullets sa .45 kalibre nga pistola.
Nagtuo ang mga kabanay sa mga biktima nga Mistaken Identity ang maong pagpamusil kanila. Nagpahigayon sab og hot pursuit operation ang kapulisan sa Samal aron masikop ang mga suspetsado.
