Suportado sa pipila ka senador ang nahimong pamahayag sa Bureau of Immigration (BI) nga gikinahanglang mupahawa na sulod sa duha ka bulan ang tanang langyaw nga mga trabahante sa Philippine Offshore Gaming Operators (POGOs) o Internet Gaming Licensees (IGLs), lakip na ang service providers.
Sa managlahing pamahayag, gikanayon ni Senador Risa Hontiveros ug Joel Villanueva nga gikinahanglang papahawaon na ang tanang langyaw nga mga trabahante nga adunay kalabutan sa POGO.
Dugang gipahayag ni Senator Hontiveros nga gikinahanglang seguruhon sa awtoridad nga mapapahawa ang tanang iligal nga POGO subay sa direktiba nga gidili ang organisasyon sa nasud.
Gilakip usab sa senadora ang mga puganteng kriminal o miyembro sa sindikato nga nagtago sa likod sa POGO ug padayong mihimo ug krimen sa sulod ug gawas sa nasud.
Samtang alang usab kang Senador Villanueva, gikinahanglang mapadali ang pagpapahawa sa POGO workers iligal man o dili sa labing dali nga panahon.
Importante usab makabaton ug koordinasyon ang BI ug PAGCOR aron seguruhong accounted ang tanang POGO workers nga gikinahanglang mubiya na sa nasud.
Nanawagan usab kini sa tanang ahensya sa kagamhanan nga sundon ug tumanon ang direktiba sa pagdili sa POGO partikular na ang Philippine Amusement and Gaming Corporation (PAGCOR).
Samtang subay niini, subling nanawagan si Senador Alan Peter Cayetano nga idili ang tanang matang sa online gambling ug dili lamang sa POGO apan lakip na ang e-sabong.
Gihisgutan usab niini nga angay hinumdumon ang mga posible pang epekto sa online gambling sa mga Pilipino ug sa mosunod nga henerasyon.
