DAVAO CITY – Nagpadayon gihapon ang konstruksyon sa pagpalapad sa detention facility sa Sta. Ana PNP aron maalibyuhan ang kaguot gumikan sa kadaghan sa mga piniriso tungod sa walay puas nga mga operasyon batok sa mga nagkadaiyang kaso ilabi na ang kalambigitan sa iligal nga druga.
Sa pakighinabi sa Bombo Radyo Davao kang PMaj.Benkalin Baluan, Acting Station Commander, buot niini nga masulosyunan ang kaguot sa selda nga dugay na matud pang suliran gumikan sa kadaghan sa mga madakpan matag adlaw tungod sa walay hunong nga pagtrabaho sa iyang mga ginsakpan batok sa malapason sa balaud.
Tungod niini, moluag na ang selda ug dili na kinahanglan pa nga mugamit og duyan ang mga piniriso aron mahiluna.
Dugang pa sa opisyal, iyang ginalantaw ang sitwasyon niini bisan paman nga nakasupak kini sa balaud apan gikinahanglan pa gihapon nga tahuron ang ilang mga katungod bisan paman sa ilang kasal-anan nga nahimo.
Apan giklaro sa hepe nga dili gihapon sila moundang sa pagpanakop sa mga malapason sa balaud ilabi na sa hisgutanang iligal nga druga.
