DAVAO CITY – Giwagtang na sa PAGASA ang pagpailalom sa Davao City sa signal #1 subay sa Severe Weather Bulletin #17 nga gipagula sa ahensya.
Apan lauman ang hinay ngadto na sa kusog nga pag-ulan sa pipila ka mga lugar nga gilangkuban sa Caraga, Eastern Visayas, Misamis Oriental, Bukidnon, Camiguin, Catanduanes, Albay, ug Sorsogon.
Samtang masinatian sab ang hinay nga pag-ulan ingon man makasinati sab og pipila ka higayon nga pagkusog sa ulan ang lugar nga gilangkuban sa Zamboanga Peninsula, MIMAROPA, Davao Oriental, Davao de Oro, Quezon, ug ubang parte sa Bicol Region, Visayas, ug Northern Mindanao.
Samtang sa pikas bahin, base sa gipagula sa Regional Disaster Risk Reduction and Management Council (RDRRMC) XI, mikabat na sa 519 ka pamilya kon 1,767 ka indibidwal sa tibuok Davao Region ang gipahikling tungod sa hulga ug epekto sa bagyong Auring.
Ang maong ihap gikan sa 14 ka barangay sa 6 ka lungsod sa rehiyon partikular sa Mawab ug New Bataan sa Davao de Oro, Mati City, Banaybanay, Caraga ug Baganga sa Davao Oriental.
Kasamtangan, wala pay natala nga samaran ingon man nakabsan sa kinabuhi sa maong kalamidad apan nagpadayon ang monitoring sa tanang buhatan nga miyembro sa RDRRMC XI tungod nagpabilin gipailawom sa SIGNAL #1 ang Davao Oriental, Davao de Oro ug Davao del Norte.
VIA // Kiez Guipitacio
