DAVAO CITY – Giangkon sa Mines and Geosciences Bureau (MGB) XI nga magkinahanglan og panahon ang pag-establisar og relocation sites alang sa mga bakwit nga biktima sa pagdahili sa yuta sa Masara, Maco, Davao de Oro.
Gikanayon ni Capter John Tubo, MGB XI senior supervising geologist, adunay listahan ang lokal nga kagamhanan sa mga girekomendar nga relocation sites apan kinahanglan pa kini nga ipaubos sa assessment.
Giila ang linya sa Masara nga usa ka giila nga landslide-prone nga lugar, nga nagpalisud sa pagpangita og luwas nga lugar. Dugang pa nga nahimutan ang maong dapit ubay sa Philippine faultline, nga nakatampo sa huyang nga yuta ug maoy hinungdan sa dakong pagdahili sa yuta nga miigo sa komunidad.
Ang buhatan, uban sa Office of the Civil Defense XI ug provincial LGU, nagpahigayon ug aerial inspections niadtong Pebrero 8 ug 12, apan ipaubos ang mga resulta sa ground validation. Usa ka team ang mopahigayon sa ground survey karong semanaha.
Wala pa mohatag og timeline ang MGB alang sa maong pagtuki tungod kay bag-o pa lang nagsugod ang ilang validation diin maoy usa sa mga basehan sa Davao de Oro PLGU ang resulta alang sa relokasyon sa mga apektadong residente.
Samtang nagpaabot niini, magpabilin ang mga bakwit nga residente sa temporaryong relokasyon nga gihatag sa Maco LGU nga anaa sa kasikbit nga barangay sa ground zero.
Matod ni Office of Civil Defense XI Regional Director Ednar Dayanghirang nga ang Maco LGU, nag-andam og lugar sa Brgy. Elizalde ug Brgy. Malamudao alang sa temporaryo nga relocation site nga mahilakip niini ang usa ka dos ektaryas nga yuta duol sa Immaculate Conception Quasi-Parish sa Barangay Elizalde, Maco; diin ilang prayoridad ang mga residente sa mga barangay sa Masara ug Mainit parehong adunay taas nga susceptibility sa pagdahili sa yuta.
Matud pa ni Tubo nga ang pagdeklarar sa komunidad nga usa ka “no build zone” mahimo lamang pinaagi sa ordinansa sa LGU, ug ang bureau mahimo lamang nga mohimo og rekomendasyon.
