DAVAO CITY – Padayon ang pahimangno karon sa Traffic Group kun TG ngadto sa mga nanag-iya og mga sakyanan nga likayan gayud ang pagmaneho kung hubog.
Kini gumikan kay mas gipahugtan karon sa kapulisan ang ilang kampanya labot sa pagpatuman sa Repubic Act 10586 kun ang Anti-drunk and Drug Driving Act of 2013. Gikanayon ni Traffic group head Police Col. Noland Rakid, moabot na sa 95 ang ilang nadakpan nga nagmanehong hubog gikan niadtong bulan sa Pebrero hangtud karon.
Gawas sa pagpatuman sa nahisgutang balaud, gipahugtan usab sa TG ang pagpangdakop batok sa mga driver og motor nga wala magsul-ob og helmet nga moabot na sa 7,091 ang nangadakpan, ug mokabat usab sa 21,774 ang nadakpan usab sa lain-lain pa ka mga traffic violations sa dakbayan sa Dabaw.
Subling gipahinumdom usab ni Rakid ang mga motorista nga angayang magmatngon ug mag-amping gumikan kay wala gayud silay madawat nga bisan unsa nga tabang gikan sa lokal nga kagamhanan sa higayon nga malambigit sila sa aksidente sa kadalanan.
