DAVAO CITY – Gikatala sa Department of Trade and Industry 11 ang ubay-ubay nga pagsaka sa mga rehistradong negosyo dinhi sa rehiyon karong tuiga.
Subay sa datos sa buhatan, nasa 21,863 ang mga rehistradong negosyo nga mas taas og 0.35% kon itandi sa karaang datos niadtong 2021 nga anaa sa 21,787 ka mga establisyemento.
Sa maong ihap, pinakadaghan ang Davao City nga mukabat sa 7,001; nga gisundan sa Davao del Norte nga anaa sa 4,245; Davao del Sur sa 4,084; samtang 2,641 sa Davao Oriental; og 904 sa Davao Occidental.
Nagpahibalo si DTI 11 Regional Director Maria Belenda Ambi nga asikasuhon na sa mga negosyante ang ilang mga business names aron mamahimong legal ang ngalan sa ilang establisyemento.
Kinahanglang iparehistro ang ngalan sa negosyo ngadto sa DTI una pa man mukuha og business permits sa ilang mga nagkadaiyang LGUs.
Samtang mukuha ug una ug permit sa Securities and Exchange Commission ang matag kumpanya og korporasyon aron makaangkon og legal nga business name registration isip usa sa mga requirements aron mukuha sa business permit.
Mamahimong ma-renew ang business name registration gikan sa DTI sulod sa 5 ka tuig, apan dili kini mamahimong legal nga negosyo kon wala kini pagtugot gikan sa ilang LGU.
Mamahimo nga makaapply og BNR appllication sa bisan asang DTI Negosyo Centers sa ilang lugar, o bisitaha online ang bnrs.dti.gov.ph alang sa pagparehistro.
via || Bombo LJF
