Padayon karon ang gihimong imbistigasyon sa mga kapulisan kabahin sa nahitabong sunog sa usa ka panimalay nga miresulta sa kamatayon sa usa ka inahan ug duha niini ka gagmayng anak sa Purok 8, Barangay Gumalang, Baguio District, pasado alas 2:00 sa kaadlawon, kagahapong adlawa.
Buot sa mga otoridad nga masuta ang tinuod nga rason sa maong panghitabo.
Sumala sa report sa Davao City Police Office, hingpit nga naugdaw ang balay nga anaa sa gidak-on nga 30 square meters, ug naalaot ang kinabuhi sa inahan nga giilang si alyas Daphne, 35-anyos ug ang iyang anak nga babaye nga si Cara, 6-anyos ug ang anak nga lalaki nga si Zee, 2-anyos.
Gilayon sumala pa nga girespondehan sa Bureau of Fire Protection (BFP) Calinan ug Central 911 Fire Auxiliary Unit ang nahitabong sunog human makadawat og tawag apan, wala na masalbar ang panimalay og kinabuhi sa mga biktima.
Sumala pa napalong niini ang sunog alas 3:00 pasado sa kaadlawon.
Matod pa ni FO3 Jason Iguana, fire investigator sa BFP Calinan, ilang gitan-aw ang posible nga rason sa sunog nga faulty wiring.
Gibana-banaan usab nga anaa sa P45,000 ang kadaot sa maong panghitabo.
Samtang giikanayon sa mga awtoridad nga ang pamilya sa biktima misalikway sa pagproseso sa Scene of the Crime Operatives (SOCO) sa lugar gumikan nagtuo sila nga walay foul play ang maong panghitabo.
Tungod niini, adunay nanggawas sa social media nga mga spekulasyon nga posibleng arson o murder-suicide ang nahitabo.
Apan sumala pa ni Capt. Hazel Tuazon, tigpamaba sa Davao City Police Office, nagpatuman na ang Police Station 11 (Calinan) og imbestigasyon aron susihon ang maong impormasyon.
Subay sa gipahayag nga sa inisyal nga findings, wala silay nakit-ang ebidensya o testigo nga nagpakita nga gisamdan sa inahan ang iyang mga anak.
Dugang pa sa kapulisan, aduna sumala pa gisaysay ang mga silingan nga nakadungog sila og paghangyo og tabang gikan sulod sa balay apan wala na silay mahimo tungod kay mikatap na ang kalayo.
Una na nga mikatag ang panghitabo sa social media nga adunay problima ang usa ka inahan sa mga bata kabahin sa relasyon niini sa iyahang bana nga anaa na sa laing babaye.
Sa pagkakaron, gihiluna na ang mga biktima sa ilahang kabanay.
