Mainiton nga gihisgutan karon sa social media ang pagkamatay sa kanhing Vivamax actress ug freelance model nga si Gina Lima ug sa iyang kanhing uyab nga si Ivan Cezar Ronquillo.
Nasayran nga kaniadtong Dominggo sa gabie, gidala ni Ronquillo si Gina sa QC General Hospital apan gideklarar kini nga dead on arrival. Sumala pa sa QCPD–Criminal Investigation and Detection Unit (CIDU) chief Lieutenant Colonel Edison Ouano, subay sa affidavit ni Ronquillo, miadto ang duha sa usa ka bar gabii sa Sabado, ug nanguli ang duha padulong sa condominium ni Ronquillo pagkabuntag.
Sa dihang gisulayan ni Ronquillo nga pukawon si Gina, dili na kini mitubag maong iyang gitawagan dayon ang iyang amahan ug dali nga gidala si Gina sa ospital.
Human misingaw ang balita sa pagkamatay sa modelo, giakusahan si Ronquillo nga mibun-og sumala pa kang Gina ug maoy hinungdan sa iyang pagkamatay.
Apan subay sa inisyal nga medico-legal report nga gipagawas sa Quezon City Police District (QCPD), namatay si Lima gumikan sa cardio-respiratory distress.
Subay usab sa initial findings, walay komosyon nga nahitabo sa condominium ug hapsay sumala pa ang kwarto sa ilang pag-imbestigar.
Sumala pa ni Lt. Col. Ouano, bisan pa man adunay gamayng bun-og sa mga bitiis sa modelo, apan mga gagmay ra nga tuldok-tuldok.
Pipila ka adlaw human sa pagkamatay sa modelo, nakitang patay usab si Ronquillo sa iyang condo kagahapon sa buntag.
Gikumpirma ni La Loma Police Station chief Lieutenant Colonel Jose Luis Aguirre nga naghunos sa kinabuhi si Ronquillo.
Gidala pa kini sa QC General Hospital apan gideklarar gihapon nga patay human sa pagsulay sa mga doktor nga i-revive kini.
Ang kamatayon ni Ronquillo nahitabo sumala pa sa taliwala sa mga kasaba ug pagbasol nga iyang nadawat sa social media nga nagpasangil kaniya sa pagkamatay sa modelo ug giakusahan pa nga naggamit daw og droga.
Pipila ka oras sa wala pa kini namatay, gipost pa niini sa iyang Facebook account ang video ug hulagway sa mga kambras ug samad sa iyang nawong ug kamot, ug diretsong iyang ginganlan si “Kevin Tan” nga maoy nagpakatag sumala pa og sayop nga impormasyon batok kaniya.
Sa usa pa ka video nga gipost ni Ronquillo uban ni Gina Lima, makita nga naggamit ang modelo og nebulizer, mao nga komentar sa mga netizen nga basin adunay asthma ang modelo.
Sa pag karon, gipaabot pa ang resulta sa toxicology ug histopathology tests sa modelo aron mahibal-an ang pinal nga hinungdan sa iyang kamatayon.
