DAVAO CITY – Gikalipay sa lokal nga panggamhanan ang migula nga survey nga ikaduha ang dakbayan sa Davao sa pinakaluwas nga lugar sa Southeast asia.
Kahinumduman nga dili lamang kini ang unang higayon nga nahilakip ang siyudad sa safest city gumikan kay nabutang sab ang dakbayan sa ikatulong puwesto sa milabay nga tuig.
Sumala sa Davao City Police Office (DCPO) nakatampo ug dako niini ang pag-ubos sa crime rate sa dakbayan diin nagpasabot kini nga mas aktibo ang kapulisan sa pagpatuman sa mga nagkadaiyang lakang aron nga masulbad ang mga krimen.
Gibutyag sab ni Pol. Capt. Ma. Theresita Gaspan, tigpamaba sa DCPO, nakatabang sab sa pag-ubos sa crime rate ang hugtanon nga pagpatuman sa balaod, kooperasyon sa mga tawo, ug gipatuman nga balaod militar.
Gipasalig sab sa DCPO nga pahugtan pa nila ang pagpatuman ug mga programa ug mga lakang nga alang sa kaluwasan sa publiko.
