DAVAO CITY – Andam na ang mga sakop sa kapulisan sa ipatuman nga seguridad sa kapiyestahan ni Sr. Santo Niño diin usa sa lauman nga dagsaon sa mga tumutuo ang Shrine hills ning dakbayan sa Davao.
Alas kuwatro kaganinang kaadlawon gisugdan ang dayana kun pamukaw dayon gisugdan sa prusisyon ug novena ayha gisugdan ang unang misa kaganihang alas siete sa buntag.
Sumala sa pamunoan sa simbahan, lauman nga anaa sa 30,000 ka mga tumutuong katoliko ang mosimba nga sagad ng naandan matag tuig.
Samtang andam na ang mga sakop sa kapulisan sa ilang ipatuman nga seguridad aron lamang masiguro nga hapsay nga mapahigayon ang mga aktibidad nga kabahin sa kapiyestahan.
Sumala pa kang Pol. Capt. Rose Aguilar, tigpamaba sa Davao City Police Office (DCPO), nga han-ay na ang ilang ipatuman nga seguridad ilabi na nga sayo sugdan ang mga aktibidad sa simbahan.
Gawas sa DCPO, lauman sab ang mga personahe sa City Transport and Traffic Management Office (CTTMO) nga ipakatag sa lugar aron lamang masiguro nga hapsay ang dagan sa trapiko.
