Gihagit karon ni Davao City Mayor Sebastian Baste Duterte si PNP Chief PGen. Rommel Marbil nga tubagon sa tinood nga rason kalabot sa pagbawas sa 75 ka mga personahe sa PNP ug Security Personnel gikan sa Office of the Vice President.
Sumala pa sa mayor nga kung laraw gayud niining pakusgan ang pagpakgang sa mga kriminalidad sa nasud, adunay option matud pa si Marbil mga magkuha og tinag-usa ka pulis sa matag rehiyon sa nasud aron makompleto ang 75 nga ihap.
Dugang pa niini nga kwestyunable matud pa ang pagkuha sa maong ihap sa usa lamang ka source ug mao ang security personnel sa iyang igsuon nga kasamtangang bise presidente sa nasud.
Hinoon, una na nga gipasalig sa OVP nga dili kini makaapekto aron sa pagserbisyo ug paghatod sa mga nag-unang tabang sa katawhang Pilipino.
Gani, naglaom pa kini nga sa maong direktiba matagaan og dalan ang tumong nga maundang ang mga krimen sa nasud.
Bisan paman regular rotation ang gikanayon ni Marbil nga rason sa maong pagbawas, dili matud pa malikayan nga makonekta kini sa nabantayang nabag-ong relasyon sa mga Duterte ug Marcoses.
Ning kasamtangan, wala pa nihatag og panahayag ang PNP Chief sa nasud Pilipinas.
