DAVAO CITY- Mas gipakusgan pa karon sa Davao del Sur ang pagbantay sa kadagatan niini pinaagi sa gipahigayong training sa Barangay Peacekeeping Action Teams (BPAT) Bantay Dagat.
Gipahigayon sa Barangay Aplaya, Digos City sa nahisgutang probinsya ang tulo ka adlaw nga aktibidad nga gipangunahan mismo sa Naval Forces Eastern Mindanao pinaagi sa Civil Military Operations Unit-Eastern Mindanao, Philippine Navy.
Muabot sa kwarenta ka mga partisipante ang misalmot sa kalihukan diin gilangkuban kini sa Purok President, Barangay Health Workers, BPAT, Bantay Dagat, Rescuers ug uban pang mga stakeholders.
Gikanayon ni Barangay Aplaya Captain Remy Karim Mamac nga usa ka dakong tabang kini ilabi na sa paghatud og kaalam sa mga residente mahitungod sa pagbantay sa kadagatan ilabi na ang pagbantay sa mga iligal nga kontrabando.
Sa pikas bahin, gikanayon sab ni Lieutenant Junior Grade Jacky Santos, Executive Officer sa Civil Military Operations-Eastern Mindanao, nga mahinungdanon gayud ang susamang pagbansay sa mga Barangay aron mapakusgan pa ang seguridad sa pipila ka mga baybayon sa Davao del Sur.
VIA|| Allianne Ferandos Silao
