DAVAO CITY- Gikabutyag sa Philippine Statistics Authority ug City Planning and Development Office nga pipila sa hinungdan nganong anaa pa lamang sa 30% ang turn-out sa Community-Based Monitoring System mao ang gumikan sa pagback-out o pagresign sa mga enumerators, hinay nga signal sa mga lagyo nga area ug maglisud nga makaapas ang enumerators gumikan tablet na ang gamit sa pagkaylap og datos.
Sumala pa nga ning kasamtangan adunay 1,300 ka mga enumerators ug anaa sa 400 ka uban pang mga personahe ang nakaassign alang sa maong proyekto.
Sumala pa ni Adeline Batucan, Officer-in-Charge sa PSA Davao Del Sur Provincial Statistical Office nga ayha pa mang nagsugod ang maong operasyon, aduna nay gipahigayon nga workload analysis.
Diin kini ang nag-identify sa gipaabot nga populasyon aron mahibal-an usab og pila ba ang i-assign nga enumerators sa mao nga area ug pila ka adlaw niya kining humanon aron dili malapas sa gilugway nga timeline.
Dugang pa niini nga ilaha usab ginapangitaan gilayon og aksyon og adunay mo back-out nga enumerators pinaagi sa pagkuha og bag-o dayun ipailawom kini sa training aron mapadali ang pagkaylap og datos.
Sumala pa nga dili gayud problema ang seguridad sa mga enumerators gumikan andam usab ang mga local nga panggamhanan nga mo -assist sa maong proyekto, ilabi pa sa barangay levels.
Ning kasamtangan, gisiguro usab sa maong mga buhatan nga ‘fast tracking’ ang ginabuhat alang sa maong monitoring diin gikan lunes hangtod sabado ginabuhat ang maong interview bisan pa man og adunay holiday.
Pagsiguro usab sa maong mga buhatan nga mga otorisadong indibidual lamang ang maka-interview ug ilaha usab gisiguro ang seguridad ug confidentiality sa mga impormasyong nakaylap gikan sa mga dabawenyo.
Kalabot niini, nag-awhag karon ang PSA ug City Planning and Development Office nga kinahanglang mamahimong matinud-anon ang mga dabawenyong motubag sa mga survey questionnaires gumikan ang maong datos ang pagagamiton sa mga plano sa syudad ug ilabi na sa mga social protection programs.
